【Now.com】Adobe發表一項叫“Reflection Removal”嘅新工具，可以消除相片中嘅反光部分，將反光位背後嘅圖像呈現出嚟。Adobe指出，呢個功能唔會用生成式人工智能，並唔會估計或自行產生唔喺相片中嘅內容。因此，用戶不必擔心消除反光後會出現同實際不符嘅影像。
目前，呢個工具仍然標示為「技術預覽」，使用亦有啲限制，其中最大嘅限制係現時只支援Raw檔，並唔兼容JPEG或其他壓縮圖像格式。另外，呢個工具目前只可以喺Adobe Camera Raw使用，不過Adobe表明未來會擴展到整個Lightroom系統。
呢款工具提供一個 -100 至 100 嘅設定範圍，當滑桿設定為 0 時，相片會保持原貌，如果設定為 100 就會將消除反光能力加到最大，簡單講就係更清楚睇到反光位後面嘅景物，用戶可以按個人需要保留適量反光，平衡相片整體影像效果。
Adobe承認，呢個功能並唔係完美，例如，目前無法處理城市夜景相片，處理大片玻璃窗反光效果會比較好，如果相片中嘅反光位比較細，最終效果可能會爭啲，處理水面反光能力亦有限。
想試用呢項「去除反光」功能，可以去 Adobe Camera Raw (ACR) 應用程式內，進入偏好設定，點選新人工智慧功能與設定面板選項，重新啟動應用程式後開啟影像。在「移除」面板中，就會出現名為「反光」嘅選項，可以試玩睇睇效果。
Photo / Adobe
